ماہرین کے مطابق روزانہ ایک یا دو کپ کافی پینے سے آپ کو لمبی عمر میں مدد مل سکتی ہے لیکن صرف اس صورت میں جب آپ کریم اور چینی کے بغیر پیئں۔
جرنل آف نیوٹریشن میں شائع ہونے والی تحقیق میں بتایا گیا ہے کہ بلیک کافی یا صرف تھوڑی سی چینی اور سیچوریٹڈ چکنائی کے ساتھ کافی پینے سے قبل از وقت موت کا خطرہ کم ہوتا ہے۔ لیکن جب لوگ بہت میٹھے یا کریم کے ساتھ کافی پیتے ہیں تو صحت کے فوائد ختم ہو جاتے ہیں۔
ٹفٹس یونیورسٹی کے سینئر مصنف فینگ فینگ ژانگ نے ایک نیوز ریلیز میں کہا، "کافی دنیا میں سب سے زیادہ پینے والے مشروبات میں سے ایک ہے، اور تقریباً نصف امریکی بالغ افراد روزانہ کم از کم ایک کپ پیتے ہیں، ہمارے لیے یہ جاننا ضروری ہے کہ اس کا صحت کے لیے کیا مطلب ہو سکتا ہے۔"
اس کیلئے محققین نے 1999 اور 2018 کے درمیان قومی صحت کے سروے میں حصہ لینے والے 46,000 سے زیادہ امریکی بالغوں کے ڈیٹا کو دیکھا۔ انہوں نے تجزیہ کیا کہ لوگ کس قسم کی کافی پیتے ہیں کیفین والی یا ڈی کیف اور کتنی چینی اور کریم شامل کرتے ہیں۔
انہوں نے اس ڈیٹا کا موازنہ کسی بھی وجہ سے ہونے والی اموات کے ساتھ ساتھ دل کی بیماری اور کینسر سے کیا اور پایا کہ کریم اور چینی کے بغیر بلیک کافی دل کی صحت اور کینسر کے خطرات کو کم کرکے عمر میں اضافہ کرسکتی ہے۔
