فیلڈ مارشل عاصم منیر کی ترقی ان کی قائدانہ صلاحیتوں کا اعتراف ہے، دفاعی مبصرین

فیلڈ مارشل کے عہدے پر ترقی پانے والے جنرل عاصم منیر آپریشنل، انٹیلی جنس سمیت مختلف امور پر مہارت رکھنے والے فوجی جنرل ہیں، فیلڈ مارشل عاصم منیر نے ملک کی معشیت کی مضبوطی، خارجہ امور، دہشت گردی کے خاتمے اور بلوچستان سمیت ملک میں قیام امن، زراعت کی ترقی، ملک میں مقامی اور غیر ملکی سرمایہ کاری کے فروغ کی جامع منصوبہ بندی اور اقدامات کے لیے اسپیشل انویسٹمنٹ فیسلٹی کونسل کے قیام سمیت اہم ترین مسائل کے حل میں وفاقی حکومت کے ساتھ ہر ممکن تعاون کیا ہے۔

فیلڈ مارشل عاصم منیر کا ان اہم قومی امور کے حل میں انتہائی کلیدی کردار رہا ہے، دفاعی ماہرین اس حوالے سے رائے دیتے ہیں کہ فیلڈ مارشل عاصم منیر نے پاک-بھارت کشیدگی کے دوران مودی کی جارحیت کا جواب دینے کے لیے اپنے تجربہ کی بنیاد پر مربوط پالیسی مرتب کی۔

آپریشن بنیان مرصوص کی کامیابی میں فیلڈ مارشل حافظ عاصم منیر کا بحری، فضائی افواج کے سربراہان سمیت وفاقی حکومت کے ساتھ مربوط رابطہ رہا اور جدید جنگی حکمت عملی کے سبب بھارت کو شکست کا سامنا کرناپڑا۔

اس حوالے سے یہ بات قابل ذکر ہے کہ بھارتی حملوں کے جواب میں جب پاکستان نے آپریشن بنیان مرصوص کا آغاز کیا تو اس دن پاک فوج کے سربراہ جنرل عاصم منیر نے نماز فجر ادا کرنے کے بعد ‏قرآن پاک کی سورۃ الصف کی تلاوت کی، اس سورہ کی آیت 4 میں  اللہ تعالیٰ فرماتا ہے کہ"‏إِنَّ اللَّهَ يُحِبُّ الَّذِينَ يُقَاتِلُونَ فِي سَبِيلِهِ صَفًّا كَأَنَّهُمْ بُنْيَانٌ مَرْصُوصٌ" ترجمہ:-‏"بیشک اللہ اُن لوگوں سے محبت کرتا ہے جو اُس کے راستے میں اس طرح صف بستہ ہو کر لڑتے ہیں گویا کہ وہ سیسہ پلائی ہوئی دیوار ہیں۔"

آرمی چیف نے تلاوت کلام کے بعد دعا کی، پاکستان کے آپریشن "بنیان مرصوص"کے تحت بھارت پرمیزائل حملے شروع کیے گئے، "بنیان مرصوص"کا مطلب سیسہ آہنی دیوار ہے، اس آپریشن کی تاریخی کامیابی میں اہم کردار ادا کرنے پر وفاقی حکومت نے آرمی چیف جنرل عاصم منیر کو فیلڈ مارشل کے عہدے پر ترقی دی۔

دفاعی مبصرین کا کہنا ہے کہ فیلڈ مارشل کے عہدے پر جنرل عاصم منیر کی ترقی ان کی قائدانہ صلاحیتوں کا اعتراف ہے۔

دفاعی ماہرین کا کہنا ہے کہ فیلڈ مارشل عاصم منیر کی اس وقت مربوط سوچ ہے کہ ملک معاشی طور پر مزید مضبوط ہو، اس حوالے سے فیلڈ مارشل عاصم منیر ہمہ وقت وفاقی حکومت کے ساتھ تعاون کررہے ہیں۔

دفاعی ماہرین امید کرتے ہیں کہ آئندہ دنوں میں ملک کی معیشت میں مزید بہتری آئے گی۔

وفاقی حکومت کے حکام کا کہنا ہے کہ فیلڈ مارشل عاصم منیر کا وفاقی حکومت کے ساتھ تعاون مربوط ہے، وفاقی حکومت قومی سلامتی سمیت اہم امور میں ان کی رائے کو اہم سمجھتی ہے۔

موجودہ وقت میں سویلین حکومت اور عسکری قیادت میں مثالی کوآرڈی نیشن ہے جس کی وجہ سے پاکستان معاشی اور سفارتی سمیت اہم امور کے حل میں کامیابی کی منزلیں طے کر رہا ہے۔